.gif)
Versión en
CULTURA DE PAZ, DE
LEI
Hai aproximadamente dous anos
que, con discreción, sen dar sentenza, como dicía a
miña difunta aboa Ermitas, iniciamos un traballo de
persuasión sobre a necesidade de elaborar e aprobar,
por unanimidade, unha lei propia, no Parlamento de
Galicia, de Fomento da Cultura da Paz, seguindo os
precedentes da catalá de 2003 e a española de 2005,
leis que para a maioría da poboación, mesmo para as
persoas informadas e do mundo académico son
absolutamente descoñecidas.
Como consecuencia das
conversas mantidas cos portavoces parlamentarios dos
tres grupos, cos respectivos de educación, co propio
goberno, co anterior e co actual, pedíusenos que
fixeramos nos un borrador que puidera servir como
documento de referencia, e así o fixemos. A Ponencia
Conxunta, finalmente, xa está en marcha en sede
parlamentaria, co que empeza o procedemento
lexislativo propiamente dito.
O borrador consta dun
Preámbulo no que xustificamos a necesidade dunha lei
destas características, explicamos polo miúdo o que
a comunidade internacional entende por Cultura de
Paz, á luz da Declaración e o Programa de Acción
aprobado pola Asemblea Xeral das Nacións Unidas en
1999, a proposta da UNESCO e do seu, daquela,
Director Xeral, Federico Mayor Zaragoza, de acordo
co Manifesto 2000 dos Premios Nobel da Paz e os
documentos que a desenvolveron durante o Decenio
2001-2011, da Cultura da Paz e a nonviolencia para
todos os nenos e nenas do mundo.
Facemos mención, como non
podía ser doutro xeito, á tradición pacífica do
galeguismo ou ó Congreso Internacional da Paz
celebrado no Ferrol en 1915, como algúns referentes
históricos, ou máis recentemente, ó Congreso Europeo
de Educación para a Paz de 1994, celebrado en
Santiago de Compostela, o primeiro continental do
movemento coñecido internacionalmente como Teachers
for Peace. E ás dúas referencias lexislativas
citadas con anterioridade e que están vixentes no
Estado, e tamén ó vixente Plan Integral de Mellora
da Convivencia Escolar de Galicia.
Como temos reiterado tantas
veces, a Cultura da Paz é un conxunto de valores,
actitudes, tradicións, comportamentos e estilos de
vida baseados na convivencia democrática e no
diálogo, no respecto pola vida e os dereitos
humanos, na confianza de que a erradicación da
violencia virá da man da educación, da xustiza e a
cooperación, e da igualdade plena entre homes e
mulleres, así como da interculturalidade.
Por iso, cando falamos de
Cultura de Paz, non nos limitamos a demandar a
educación para a paz, os dereitos humanos e a
democracia nas escolas, senón que insistimos no
diálogo intercultural e interrelixioso (Alianza de
Civilizacións), na superación da exclusión e a
pobreza (Obxectivos do Milenio), na resolución
pacífica dos conflitos ou na prevención e
consolidación da paz.
O articulado aborda o obxecto
da lei, delimita os ámbitos de aplicación, Xunta e
entes locais, e prioriza actuacións en relación cos
dereitos humanos e as liberdades individuais e
colectivas, a convivencia cidadá, a educación, os
medios de comunicación social e o fomento do
desarmamento global.
Quero resaltar as aportacións
que desde a diversidade funcional se incorporaron ó
texto base. Tamén a que, por primeira vez, se
propoñen axudas anuais específicas para a
realización de actividades, estudios e
investigacións en materia de paz, así como a
posibilidade de crear un Instituto Internacional
pola Paz en Galicia, con funcións moi detalladas
como poden ser a promoción da investigación, a
formación, e a difusión da cultura da paz, actuar de
observatorio sobre paz e conflitos, apoiar e
asesorar á sociedade civil, ó propio Parlamento, ó
Goberno e ás administracións públicas, establecer
redes con institutos similares como o de Cataluña e
no ámbito internacional.
En definitiva, un proxecto
que con toda probabilidade será aprobado, por
unanimidade, só así terá sentido e o noso apoio,
neste ano emblemático, por tantas razóns, do 2010,
no que o Seminario Galego de Educación para a Paz
celebra o seu XXV Aniversario.
Que así sexa...
Manuel Dios Diz
preside o Seminario Galego de Educación para a Paz e
dirixe a Fundación Cultura de Paz en Galicia.
27-06-10
Enviar a un amigo
RELACIÓN DE ARTÍCULOS
PUBLICADOS en
EDUCAsites.net
Búsqueda de Artículos en Google Académico:
Home